The Dittersdorf Symphony Project

Er du komande masterstudent i musikkvitskap i Trondheim, med sterk interesse for wienerklassisk musikk? Kunne du tenkje deg at masteren din både blei til ein bokpublikasjon og til ei innspeling?

Carl Ditters von Dittersdorf (1739–1799) var ein ungdomsven av Joseph Haydn, eitt av dei viktigaste tidsvitna våre frå Wiens musikkliv, og den mest produktive symfonikaren frå Haydn-generasjonen – og òg ein glimrande komponist. Av dei 117 symfoniane som ein i dag meiner at han skreiv, har berre ein brøkdel vore sett på i moderne tid. Dette inneber at verka til ein av Haydn og Mozarts viktigaste samtidige ikkje har kunne bli evaluert ordentleg korkje av publikum, musikarar eller forskarar.

The Dittersdorf Symphony Project (DSP) er eit samarbeid mellom plateselskapet Naxos Music, notehusa Artaria Editions og Schott Music og Senter for Tidligmusikk i Trondheim. DSP har som mål å få realisert draumen om ei fullstendig Dittersdorf-utgåve.

DSP kan tilby fylgjande:

• Opplæring i edisjonsarbeid ved Halvor K. Hosar, som òg vil vere medrettleiar i masteren.
• Masteroppgåva di vil bli til ei noteutgåve på Artaria Editions, som vil bli distribuert av Schott Music. Denne vil bli tilgjengeleg både i fysisk og digital utgåve, og med stemmemateriale til leige.
• Innspeling av verket på Naxos Music, i ein serie med Dittersdorfs samla symfoniar.
• Det er ikkje mykje pengar i edisjonar, men noko kan det kome ved utlån av notemateriale. Dette kan vi ikkje love, men inntekter frå edisjonane vil gå rett til studenten.
• Vi kan ikkje lova, men vil arbeida for å få til ei studentframføring av verket i Noreg.
• Det kan bli aktuelt å senda ein student på ei sponsa forskingsreise, der studenten vil få erfaring med musikalsk kjeldearbeid.

Vi ser etter ein student med den fylgjande kompetansen:

• Interesse for og kunnskap om den wienerklassiske perioden.
• Gode evnar til å lesa partitur.
• God kjennskap til Sibelius, Finale eller Dorico.
• Kunnskap innan aktuelle framandspråk utover engelsk er eit pluss.

Interesserte studentar kan melde seg til Halvor K. Hosar eller Tore Størvold. Prosjektet er meint for studentar som er ferdige med mastergraden sin i perioden 2026–2030.